Zwan leger darauss die Creiizhew gand
Item: wann Ir mit dem zufechten zu zusamen koment, so schich dich also mit disem Leger deinnen rechten fuoss furgesezt dein duseggan mit dem hefft bei deinnem rechten knie dein linncke hand hinden bey dem Ort, hawt er dir dann oben nach deinner plosse, so gee auf mit deinnem Duseggen uber dein haupt das dein linncker fuoss fur gesezt, so ist Im der haw versezt, Indes haw Im mit ainnem dopelten Creuzhaw zu seinnem haubt. Hawt Er dir dann also zwifach oben ein unnd du dein Duseggen auf deinnem rechten schennckel hast, die lanng schneid gegen dein ajan den ort gegen der erden deinnen rechten fuoss fur gesezt, so verscheub Im das Creuzweyss mit deinner kurzen schneid, Indes sezt Im mit ainnem unndern schnit an seinen rechten arm unnd greiff mit deiner lincken hand an seinnen rechten Elenpogen, so scheubstu In von dir, volg mit deinnem lincken schenckel hinnach und haw Im zu der obern plosse, scheubt er dich also von Im unnd begert dir oben ein zu hawen, so spring mit deinnem lincken fuoss hindersich so kannstdu widerumb zu deiner arbait komen.
