Page:Cod.10825 104r.png

Ein oberer schnit mit ainnem Absezen

Item: wann du mit dem Zufechten zu dem ajann kompst, so schich dich also mit dem obern schnit stee mit deinnem rechten fuoss vor und haw Im mit ainnem gestrecktem oberhaw nach seinnem haupt, schneid Im damit nach seinnem angsicht, begert Er dich also zu schneiden, so trit mit deinnem rechten fuoss hinnein und verscheub Im den schnit mit deinner lanngen schneid, Indes greif mit deinner lincken hand vornen Inn deinnen Duseggen unnd mit deinnem Ort fall Im ann seinnen hals, reiz In damit zu dir, Indes volg mit deinem lincken schennckel hinnach, so magstu In werffen, begert er dich also zu werffen, so trit mit deinnem rechten fuoss zuruck und kum mit deinner lincken hand deinnem duseggen zu hilff und schneid In also mit der sterck von dir, so wirstu des wurffs ledig, Indes sprinng widerumb hinnein und haw Im mit ainn schaitler zu seinnem haupt, versezt er dir das, so heng auf dein lincken seitten und haw Im zwifach widerumb lang oben ein, hawt er dir also zwifach oben ein, so wind dich under seinnem haw durch mit deinnem Duseggen wol uber dein haupt In gute versazung unnd thusam wollest du Im oben einhawen und stich Im nach seinnem gesicht.