Page:Cod.icon. 393 I 095r.jpg

Alia.

Adversario incurrente levatis brachijs, et tu quoque eodem modo constiteris, dextra ensem manu teneas, si inde eius brachium removeris, sinistrum pedem, eius dextro postponas, sinistrumque brachium ante pectus ipsius exeras appraehendendo latus sinistrum, atque si in coxam sinistram posueris tuam, eum reijcias, eas igitur luctas duas utrinque exerceto.

Rursum si incurrat ense adversarius, brachio demißo ita ut nequeas transcurrere, hos subsequentes habitus usurpato.

Si hostis incurrat ense sublato, verum manibus nonnihil demissis, sinistram ab ense si removeris, ea hostis dextram corripito interius inter manum ipsius utramque, inde in latus sinistrum convertas, atque dextra ensem continente caput ferias superné. Sed si nolueris ferire, tum dextrum pedem prosiliendo, adversarij sinistro postponas, atque brachio dextro collum ipsius antrorsum, vel retrorsum si circundederis, per genu dextrum eum prosternas.

Alia

Quum incurrat adversarius ense, manus autem eius sint demißiores, remota manu sinistra ab ense tuo anterius, dextra nodum super dextram hostis manum exterius dirigas, atque supprimas: inde autem si cubitum ipsius dextrum sinistra manu corripueris sinistrumque pedem prosiliendo, hostis dextro praeposueris, per eundem supprimas adversarium.

Alia.

Incurrente hoste, tu ensem abijcias, mutata dextra eius dextram eadem corripito externé, sinistra autem cubitum ipsius hostis dextrum adprehendas, inde si sinistrum pedem per sinistrum brachium tuum, ipsius brachio dextro anteposueris, necnon sustuleris, hostis interclusus est, atque disrumpere brachium poteris, vel pronum per pedem sinistrum deijcere.