Wiktenauer logo.png

Page:La noble science des ioueurs d'espee (Andre Paurenfeyndt) 1538.pdf/80

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

La sixiesme pieche

Sil a tire son poingnart, & vous point le vostre, et sil boute apres vous montez a tout vostre dextre braz de dessoubz en hault, & happelle a tout vostre main droicte derier la sienne & prenez a tout vostre main gauche son droict cubit, & prenez son braz tout oultre, & le ruez a terre.

La septiesme pieche

Sil a son poingnart tire devant vous, et sil boute par deseur apres vous, recepuez le coup sur vostre senestre braz, & prenez par dedens a tout vostre senestre main son dextre braz aupres de sa main, et le pressez a vostre senestre coste, & le iectez ariere de vous, ainsi vous luy rompez le braz, & si le voulez iecter dessuz son doz, saillez a tout vostre droicte gambe apres sa senestre coste, & prenez a tout vostre main son droict braz par dessoubz, ainsi le iecterez oultre les cuysses.

Icy commenche lors ou maintenant la maniere pour jouer a tout le bouclie.

La premiere piece hors le hault debout

Quant vous frappez le deseur coup apres lhomme, mectez vostre pommeau par dedens sur le bouclie envers le poulx, & boutez par dessoubz au deseur apres son visaige, & tournez contre son espee, & laissez voler, cela va a deux costez

La seconde pieche hors le coup par dessoubz

Quant il frappe par deseur apres vous hors les dextres a selles, tournez contre luy sur vostre senestre coste contre vostre bouclie, ainsi serez entre deux boucliez, lors tournez sur le coste dextre, & montez apres le visaige, sil defend cela & lieue son bouclie, prenez la senestre gambe, cela va aussi a deux costez