vor mit der zwirch under seiner klingen ahn sein hals
Item zwircht er von unden das du nit darunder khommen khanst, so fang sein zwirch mit furschuben ahn dein schilt, das dein kling uber seine uberhengt
Von thritten
Am thretten ist viel geegen, darumb schaw das du einem jeden haw seinen thritt gebest, den wan du ihm zu der bloß hawest, und thritest nicht mit dem fuß von welcher seitten du gehawen hast, so ist der haw kein nütz, wan du aber den haw nich gantz sonder drauest zuhawen, so darffest auch nicht gantz thretten, sonder nhur mit geberden stellen, als threttestu, doch wirt dich solches die ubung besser lernen, zweyfache thritt mach also wan du mit dem rechten zu seiner lincken tretten bist, erfordert dan dein stuck das du noch ferner herumb threttest, so thrit behend mit dem lincken fuß dem rechten nach hinder dein rechten hinauß oder[1] furuber, ehe dan du dan den lincken nach kaum setzest, kanstu mit dem rechten furt dretten, Den schnidt zwifachen. Merck diß nach volgent stuck hawet einer uff dich von seiner rechten, so haw auch von deiner rechten zugleich mit kurtzer schneid und gekreutzigten henden in dem die schwertter riren, so thrit in ein zwifachen thritt, mit dem rechten fuß behendiglich ferner umb sein lincke zu ihm und fall mit langer schneidt vom schwerd uff sein arm, itzt schrenck uber, fert er uber sich und wil den schnit nicht leiden, so volg mit dem undern schnidt nach uff sein arm
- ↑ The first letters are difficult to make out due to a (water?) damage.
