Item schick dich in das Lang ort zur versatzung hawt er gegenn deiner Lincken zum Kopff so fang sein streich mit Langer schneidt, und zuck als dan umb dein Kopff, haw in zu sein rechten arm durch und stich in obenn vonn deiner rechtenn zum gesicht, hawet er dir aber zu der rechten so versetz unnd haw in zum gesicht oder durch sein Leib.
Hawt er aber behendt vonn beyden seitenn durchs Creutz oder sticht vonn beiden seitenn so versetz lang von dir und wan er ein streich zween drey vier gethon hot, so haw als dann mit dem Radt gewaltig noch inmer streich in streich als dan Creutz unnd balghew wie volgt.
Merck hawet einer auff dich von seiner rechtenn gegenn deiner Lincken so haw mit einem starckenn Oberhaw von deiner rechtenn darauff und hawe behendt wider nach von deiner rechtenn durch sein Linckenn es sey undenn oder obenn wo du ihn threffenn kanst bis baldt wider auf zur versatzung.
