Page:MS B.26 022r.png

[I]tem hier sind geschrieben vnd gemalt vier stuck nacheinand[?] die die Maister leren da gar hubsche ringen daraus das erst wil dich einer an stechen aus dem kurzen oder langen swert So weis Im den stich starck aus auf sein rechte seiten vnd drit resch zu vnd fah Im sein klingen vnter dem swert auf den prust / vnd setz Im die lincken handt mit dem swert auf sein prust das Im dein klingen vber zwerch an sein hals stee vnd In dem stechen drit hinter In vnd setz Im dein Rechts pain hinder sein rechts pain vnd wurff mit deiner lincken handt vnd swert bey seim hals ober dein Rechts pain an sein ruck

[A]ls den will dich aber ain[er] oben an stechen aus gewap penter handt so weis Im den vbersich aus vnd In dem weisen stich Im dein ort vnd swert vber sein klingen vnd zwischen sein vnd sein rechten arm ein vnd drit resch ein vnd versetz vnd verpindt Im sein lincke handt vnd swert mit deim swert zwischen dein henden mit der klingen vber sein lincke handt / vnd drit starck inzu / vnd druck In die hanndt an sein prust vnd kopff / das mit magstw wol zuringen komen od[er] sein swert nem[en]

[D]as ander stuck will dich ainer oben an stechen so / weis Im den mit dem ort bey seim ort oder stoss Im sein ort zwischen den hendten mit deiner klingen starck vbersich auf vnd Im dem ausweisen oder dem auf stossen so las dein arm hendt vnd swert vmb gen / vnd stos In starck mit dem knopff vnder sein augen oder sein hals vnd In dem stos drit zu Im auf Ringen als dw wol waist

[D]as vierdt stuck will dich aber ainer aus gewappent[er] handt oben an stechen / so weis vnd stos Im sein ort vbersich auf vnd auss vnd In dem ausweisen drit Imer mer starck nach vnd in zu vnd verpint Im aber sein lincke handt zwischen dein hend mit der klingen vnd dreng In also zu ruck vnd stich Im auf sein lincks pain wen ers fur setzt so las dein swert vber den kopff fallen vnd ergreiff Im bey dem pain starck mit dein baiden henden vnd arme[n] vnd Zuck Im das pain starck auf vnd wirff In an sein Rucken