Aus dem arm so gedennck albeg das dw in vast mit der tenckenn hannd in der maus seins rechtenn arm vnnd mit der rechtenn hand in vast auswendig seins tenncken arms vnd mit der tenncken hand die do In in twiest hast druckt vast zu ruck vnd mit der rechtenn hannd begreyf sein tencke hand vorn vnd zeuch die vast zw dir vnd wenn dw ainen also geuast hast so treyb die her nach geschribenn ringenn
wenn dw in geuast hast mit der tennckenn hand in der maus seins rechtenn arms vnd mit der rechtenn vorn bey seiner tenckenn so far mit deiner rechtenn hannd auf seinen rechtenn arm vnd begreyff inn vnd seinen rechtenn elpogenn vnd zeuch denn domit zue dir vnd mit der rechten da dw Im sein /+tenncke/ hannd in hast stoß im denn arm //// von dir//
wenn dw in geuast hast mit deiner tenncken handt in der maus seins rechten arms vnd mit der rechtenn vor bey seiner tennckenn so heb im auf denn techkenn[1] arm vnd dem vber seinen hals vnd mit der tencken hand begreyff sein techtz[2] pain in der chnye pug vnnd würff in also vber dich Ober
heb im auf denn tenncken arm mit deiner rechten hannd vnd greyff im mit deiner tenckenn vnden an seinen elpogenn vnd zeuch do mit zw dir vnd mit der rechten stos obenn von dir vnd spring mit dencken fues fur sein rechtenn vnd würff in aus dem fueß vber sein denncks pain
mer ein ringenn aus dem erstenn vassenn
halt in vast mit der rechtenn hand sein dencke vnd greyff mit der tencken der rechtn zw hilf vnd halt vest mit paidn henndenn vnd went dich durch sein arm auf sein rechte seyten so prichst dw Im arm vnd gewinngst im denn ruck ann
Also prich das
wer dir durch get da ge mit durch vnd fall in welches ringenn dw wild
//
Ein arm pruch
Halt dein swert [!] in deiner tenncken hand vest mit paiden hennden vnd went Im sein arm auf sein tencke seytenn vnd zeuch Im den tenckenn arm vber sein rechte achsel vnd ruck vndersich
Ein pruch wider die erstenn stuckh
wenn dir ainer hat geuast dein tencke hannt mit seiner rechtenn vnd wil mit seiner tenncken vnden durch greyffenn an dein elpogen vnd wil dir denn ver rencken oder wil seiner rechtenn hand zw hilf chumenn vnd sich durch durch [!] denn arm wennden die weyl er mit dem rechtenn der tennckenn ze hilf greyff oder nach dem elpogenn In dem selbenn far im mit deinem rechtenn arm oben vber sein tennckenn vnnd vaß in In der wüest vnd spring mit deinem rechtenn fueß hinder seinenn tennckenn vnd würff in aus dem fueß vber dein rechtz pain
Wenn dich ainer an greyft obenn in die arm mit sterck vnnd helt dich vest vnd wil dich dringen so far im mit deinem rechten arm von aussenn vber sein tennckenn vorn bey seiner hand vnd begreyff mit der tencken sein rechte vnd druck mit paidenn henndenn fest ann die prüst
wenn er streckt die finger an der hannd die dw im an prust druckst so greyff Im die vinger mit deiner tennckenn hand vnd heb vbersich auf dein tenncke seytenn vnd mit der rechtenn hannd nym im das gewicht bey dem elbogenn
Item helt er aber die hannt zu deiner prüst so spring mit dem rechtenn hinder seinen tenncken vnd begreyff mit deiner tencken In die chnyepüg seins tennckenn fueß vnd heb domit auf vnnd mit der rechtenn stoß in oben vonn dir//so felt er
wenn dir ainer laß hab in den armen wenn dw mit im ringen wild so greyff mit deiner tenncken hand obenn vber sein rechte vnd begreyff sein tencke hand bey denn fingern oder sünst vnd heb auf dein tencke seytenn vnd mit der rechtenn nym im das gewicht pey seinem tennckenn elpogenn
Wer dir das tät vnd dir mit der tencken hannd zw denn fingern greyft vnd wil dir mit der rechtn das gewicht nemen bey dem elpogenn dem far mit deiner rechtn hannd vnder seiner denckenn arm In die wüest vnd spring mit dem rechten fues fur sein paid fueß vnd wurff in also
Ein pesser pruch
wenn er dir mit der tenncken hand dein tenncke begriffenn hat vnnd wil dir mit der gerechtenn das gewicht nemenn
