Das visier vnd zeuch vbersich vnd mit dem chnye druck nyder yst sein visier offenn so greyff mit den vingernn Im in die augenn oder greyff mit baidenn hennden an die haubenn vnd verdra im den hals so velt er wider auf den pauch
Item velt er auf denn pauch so val auf den arm mit deinem chnye im glenck vnnd brich vbersich
nu wenn er auf dem pauch leyt so sicz auf in vnd schreyt vber sein arm vnd prich imbs
Item sich im auf sein achsel schritling vnd zuck im den chopf vber sich
Item sein recht hannd auf denn ruck wol vbersich gedaucht
Greyfft er dir in dein visier mit den fingern wenn es offen yst von vndenn auf wenn dw auf dem pauch leyst so slach mit deiner tenncken hand an sein tenncke
oder mit deiner rechtn hand an sein rechte vnd ruck ann dich vnd druck dein haubt zu der erdenn vnd hilf mit henndn vnnd mit fuessen so chumbst auff
Ob dich ainer auf deinen ruck wurfft in dem als dw wellest leg dein tenncke hannd auf dein prust vnd wenn er auf dich velst so greyff mit deiner tenckenn hannd an seinen tencken elpogenn vnd mit deiner rechtenn hand greyff vnder dein tenncks chnye vnd heb vbersich vnd mit deinem leyb schupf dich resch auf in
Wenn er dich mit dem tegn arbait so schupf dich albegenn aufwercz magst dw dein tenncke hand gewinenn so greyff im vnnder sein hannd vnder den degen vnd thue dy hand zue wenn dw greyffen wild vnd wenn dw im die hand geuast hast so greyff mit der rechtenn an sein tenncken elpogenn vnd heb vbersich zuck das recht chnye zw dir vnd besuech ob dw in vonn dir mugst gestossenn
Ein gutes halden in dem ringenn
begreyff mit der rechtn hand sein rechtenn arm hinder seiner rechten hand vnd mit deiner tenckenn hannd nym im das gewicht pey seinem rechtenn elpogenn vnd stos sein rechtn arm mit deiner rechtn hannd wol vber seinen tennckenn arm vnd trit hinder in vnd halt in also vest hast dw in nit geworffenn so halcz sein rechcz painn vnd dem chnye vnnd wurff in nyder
Wenn dw ainenn vnder dich geworffenn hast so schneyd oder reyb ein groß stuck aus seinem wappen rock vnd stich im das in sein visier mit dem tegenn vnd laß in das nit aus gewinen das ist gut wenn es kotig ist oder wurff im das visier voller staubs oder stich mit deinem tegenn erd auf vnd würff im das ins gesicht
Wenn dw chain ploss an im nit gesehenn magst so sneyd im denn wappenn rock auf auf [!] denn armen oder die hossenn vnd was dw sichst von nesteln das Im auf vnd vindest dw ein gurtl die sneyd auch auf da findest etwas an das dir guet wird vnd sich gar eben auf seinen degen das er dir da mit nit schad
dw macht in auch slachen mit dem chnopf oder stossenn zw dem herczenn wenn er leyt oder zw denn achselnn oder zw anndern gelennckenn
Itm in der ver reydenn slach obenn oder Vndenn ann sein enckel vnd zeuch obenn auf sein seytenn mit der rechtenn
also suech auch die ploß hindenn zu denn schultern vnd zuck nit wider hinczer [?] sichert
Das ist maister Marteins hunczfeltz chunst zu roß mit der glaffen vnd mit swertt
Zu ross streiten
lern mit paidenn seytenn
darnach
dein roß gurten gewisse
auch merck die seytenn
da dw auf vortail gerst zu streitenn
wer auf dich sinnet
sein swert zw dir chömenn gewinet
an zweyffl wind an
wild dw chainen schaden han
darnach merck
die glaffenn bedeckenn mit sterck
Erst ploß zw rennen
so vaß dein zaum lannck mit sinenn
dar nach zu streitn
die gläffenn twer vber ein seyten
so merck die seytenn
da dw mit chunst gerest reytenn
so reyt mit sinnen
so dw abgeseczen gerst gewinenn
recht lanng las hangenn
das lob ich laß rangenn
Wer auf dich wil hauen
verseczenn sold dw dich freyenn
wenn dw hast verseczt
so sein all sein hew verleczt
so findest snyt
hindenn vnd vor mitte
dar nach im ab haw
zaum linck pey sunder / im traw
