Zue der 5. oder folgenden figura
In dieser folgendenen figura ist fast das ganze fundamenta des ringens vnd werffens zubetrachten welches dan zue mehrern theil am gewichte mit den fußen, an der teilung des leibes, an das vbers leibs declination vnd an den juncturis vnd griffen geleg, welches geschehen soll eher man nach den ganzen leib faßet oder angreiffet, sondern allein die eußersten schwechen vnd veleidligsten orter des leibs angreifft als nemlich am vbern deil des hals die juncture maxillarum, circa nitia aures.
Am vntern teill des leibes Membrum Virile seratum et feemores
In Extremitatibus juncturas membrorum aut ligamenta articulationum, vnd die achseln elbogen hende vnd finger, item vmb die knie kuchsel vnd zehen, welches alles nach der declination des leibes vnd nach dem gewicht deßelbigen sol gebraucht werden alß nemlich furwerts, hinderwerts vnd seidlings vntwerd zur rechten oder zur lincken seiten, wehie sich der kegentheill od wiederpart zue meisten neiget vnd decliniret. So kan man mit geringer arbeit seinen wiederpart abbrechen, vnd zur erde werffen, kan auch zue beiden seiten lincks vnd recht gebraucht werden.
