Ein schwertnemen mit ainem Schnit.
Item schick dich also in das zufechten. Stee mit deinem rechten fuß vor, und haw Im lang oben ein zu dem kopff. Versetzt er dir das, unnd hawt dir auch entgegen, so laß dein lingge hand von deinem knopff, faß baide schwerter zusamen, unnd reiß damit auff dein lingge seitten, so nimbst du Im das schwert. Reist er dich also zu Im, so tritt mit deinem linggen fuß auff seinen rechten, und tritt mit deinem rechten hinnach, und schneid Im mit langer schneid, scheub In damit von dir, so machst du dein schwert ledig. In dem haw Im behendigelich oben ein. Hawt er dir also ein, so versetz Im das mit langer schneid, so kombst du oben wider zu dem schnit, und magst Im hawen, schneiden oder stechen. Will er in des also auff dich arbaitten, so tritt mit deinem rechten fuß zurügk, so magst du auch gege Im brauchen haw, stich, oder schnit, unnd behendigelich mit Im umb das vor, unnd umb das nach.
