Der unnderhaw vom baiden seiten
Item: schich dich Allso Im den unnderhaw stee mit deinnem rechten fuoss vor unnd hallt dem Duseggen mit dem gehultz vor deinnem haupt den Ort gestrach gegen dem ajan, Indes volg mit deinnem linckes schenncke hinnach unnd haw Im die zwirch zu seinner rechten seitten seines kopffs, versezt er dir dann die zwirch, so zuck das alte treffen unnd haw Im wider ein zu seinen rechten arm, hawt er dir also zwifach ein auf dein rechten seitten unnd du mit deinnem lincken fuoss vor steest, so sez Im das ab mit deiner lanngen schnerdin, Indes wind auf uber dein haupt und trit mit deinnem rechten fuoss hinnach unnd haw Im behennd ein zu der obern plosse seinner rechten seitten, versezt er dir das, so wind Im den Ort zu seinnen gesicht oder der prust, sezt er dir den also ab, so volg mit deinnem rechten fuoss hinnach und haw oben zu der schaitel.
