Der zwingerhaw mit der schranckhut
Item: so du mit dem zufechten zu dem ajann kompst, so schich dich also Inn den zwingerhaw stee mit deinnen rechten fuoss vor dein duseggen auf deinner lincken achsel, Indes volg mit deinnem lincken schennckel hinnach unnd haw Im nach seinnem rechten arm, so zwingstu In das er dir versezenn muss, zwingt er dich also zu versezen unnd du mit deinnem rechten fuoss for steest Inn der Schrannckhut den Ort auf der erden die lanng schneid gegen dem ajann, so zeuch deinnem rechten fuoss zuruck und gee mit dem duseggen auf fur dem haupt, Indes trit mit dem rechten schennckel wider hinnach und haw Im nach seinner lincken seitten, versezt er dir das so henng auf dien rechten seiten das die lanng schneid ober gewendt sey, spring mit deinnem lincken fuoss hinder seinen rechten und haw Im mit der zwirch zu seinnem rechten ohr, zwirch er dir also zu deiner rechten seitten, so versez Im dass mit deinner lanngen schneid, Indes trit mit deinnem rechten schenckel hinein und schneid In mit ainem undern schnit In seinen rechten arm und In dem schnit greiff mit deiner lincken hand nach seiner rechten so hastu Im die ober ploss abgewunnen
