Oder stosse ime, mit deiner rechten hannd, seinen linnggen elenbogen übersich, unnd wennd ine allso von dir.
Aber ain Rinngen.
Item wann du dich mit ainem gefasst hast, bej den armen, hellt er dich dann loß, so schlag sein rechte hand auß, mit deiner linnggen von oben nider, unnd far ime damit unnden durch sein rechte seitten, unnd begreif ine hinndten, und hallt ine vesst, unnd zucke, unnd mit der rechten hannd begreif ine außwenndig in seiner rechten kniebüge, so wirfstu ine auf die linngge seitten, und das geet zu baiden seitten zu.
Die Leibrinngen.
Item Wann du dich mit ainem gefasset hast, das du ain hannd unndter seinen arm hast unnd die annder oben, unnd er auch allso unnd ainer der anndern zu ime rucket, so magstu ine mit der hannd, die du unnden hast, hinnden begreiffen, unnd fasst hallten, unnd ine werffen mit dem rinngen alls nechstvorgeschriben steet.
