Custodia iubata, ubi eques ensem equi auribus interponit, contra custodiam lateralem.
In modo commemoratum habitum ea ratione componito te: educto gladio in occursu celeriter, eum dextra ex femore dextro contineas, ense nudo auribus equi seu iubae imponito, mucrone contra hostem porrecto. Sed si is pari modo te adgreditur ense stricto, tu vicissim obviato ense educto eum dextra contineas ex latere sinistro in habitu lateralis custodiae supra manum tuam sinistram. Si itaque consistas, et adversarius contra buculam tuae galeae certet ex custodia iubata, tum eum removeas ense tuo in latus dextrum tuum, inde autem in praetereundo caput ipsius retrorsum ferias.
