Habitus quo manibus ensis capulus, utrinque imponitur.
Quum ensibus strictis mutuo concurritis, et hostis ictu superno ferire conatur caput tuum, tunc contra ipsum ex latere ipsius dextro invehitor conversa acie longa contra ipsius ictum, atque ensis munimento intercipito. Inde proxime ad ipsum concurras, atque si capulum nodo porrecto retro adversarii gladium torseris supra ipsius dextram continget, ut nodus ensis tui hostilis ensis nodo supponatur. Inde supprimas sinistrorsum in progressu, et si habenas iam hamo inferiori inieceris, sinistra mentum hostis corripere poteris, atque hostem urgere, ut retrorsum concidat in progressu. Verum si id ab eo contra te fieri animadverteris, coniectis habenis in hamum, utroque brachio ipsius brachium comprehendito interne, inde si firmiter propuleris, te facillime liberum reddes.
