Sextus
Dextrum rursus etiam hoc habitu liberabis, pariterque ratione paulisper ut superius hostem tractes, et post totis viribus eum propellas, verum subito praeter ipsius opinionem ipsum attrahito. Inde manum dextram superimponas ipsius genu externe. Humerum vero dextrum adiungas brachio ipsius hostis dextro, deorsum si demiseris resupinum prosternes adversarium. Etiam is habitus utrinque exerceri poterit.
Septimus
Etiam in hoc congressu mutuo dextrum brachium liberes, post si hostem pro viribus pepulisti, de repente inopinantem rursum ad te attrahas, atque manum dextram genu ipsius adversarii dextro externe superimponas, nec non humerum dextrum brachio dextro supposueris, tum etiam deorsum demiseris, resupinus hostis concidet.
Librae Habitus
Si quis se in libram composuerit, neque concedit, ut superiorum habituum aliquo utaris, tum dextrum brachium evellas, atque brachium dextrum intercludas hosti. Inde si retrorsum traxeris, brachium infringes. Id etiam utrinque exercebis.
