Aliud luctae genus
Si pari certamine extentis brachiis cum aliquo concertes, tum manu sinistra iuncturam manus itidem sinistrae adversarii corripito, eamque circumflectas, tum vero dextram dextro ipsius cubito adiicias, et inde eum dextro pede praecesseris, brachium hostis praedictum infringes. Utrinque et hoc exerceas.
Colluctatio extentis brachiis
Cum collucteris cum aliquo brachiis porrectis, in libram te deorsum demittas, et curabis ne subprimaris vel succumbas. Si igitur adversarius superne te transversim corripere conetur, tum subito ipsius cubitum tu adprehendito, atque abs te illum removeto. Ipsum deinde altero pede antecedas, atque ex ea compositione pronum deiicies. Id utrinque exerceas.
Habitus et admonitio, si cum forti lucteris
Si cum forti luctaris, et tu nullo excellenti habitu uti poteris, tum curato ut te quamprimum liberes, brachio tuo inverso ipsius item brachium concutias externe, inferne autem appetas sinistrum pedem, atque ea ratione brachium ipsius infringes. Etiam id utrinque procedit.
