versatzung mit, wan aber einer von oben hawet, unnd der ander hawet dargegenn mit einer zwirch. So versetzt er unnd thrift mit ein ander. Also und dergleichenn sol man ein aufscheus haben, auf die gleich hew unnd seines urtheils[1] darinnen guth acht nemen. Dernhalben sol sich ein jeder fechter gewenen das er baldt bedacht sey wie oben auch gemelt dan wo zwen guter fechter zu samen khomen welcher iehe bedacht der zeugt ehe vor.
Also hab ich das schwertfechtenn unnd alle nodtwendige stuck doch kurtz und summarischer weiß gesetzt und auch die wörter welche zum theil finster, etlicher massen erklert, und demnach in eim gang, und den gang in drey theil, nemblich wie anfenglich gemelt. Anfang oder angreiffen nachthrucken, oder mittel arbeit, das letst abzihenn oder enden, domit man es besser[2] verstande wil ichs curtzlich widerholen. Also, zum angrif hab ich gesetzt die leger in welchen man nicht verharrenn soll, und darin warten, sonder dardurch auf das furderlichst angreiffen mit derenn obgemelten hewen einen oder zwen nach gelegenheit, so er nun also angreiffenn und das vor in abgelauffen ist, so soll man in andern theil nach trucken mit allerley fuglicher hanndtarbeit, das vor zu behaltenn, welche handarbeit auch oben gesetzt. Zum drittenn in mit der handtabbeit (sic) also bedrengen, unnd engsten, das man ohnn schadenn zum abzug mug khomen.
