Wiktenauer logo.png

Page:MS B.26 021v.png

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

[E]in gar gut stuck zu gewappenter handt wen dw vor ainem stest so fas dein swert In gewappente handt vnd setz dein lincks pain vor vnd leg die klingen mit dem ort auf das pain auff das knie das der ort vntersich stee gen der erden vnd der knopff vbersich gen dein rechten vchssen / vnd stee also wen er den gen dir drit vnd will dich an stechen so weis Im den stich aus mit dem ort / vnd In dem weisen so drit resch mit dein rechten fus fur Inner sein lincks pain / vnd In dem weisen vnd In dem drit so windt dein swert vmb In der handt das Im der knopff an den hals kumb / vnd wirff In oben mit dein knopff bey dem hals vber dein rechts pain bey seine[m] lincken pain Zuck er dir aber sein lincks pain / vnd drit zu Ruck so gib Im ein mortlich[e]n stoss mit dem knopff vnter sein augen vnd wert den aber auf In recht als vor Auch mus es miteinander zugen gar Reschlich das auss weisen vnd der drit hinterzu vnd den knopff Zu dem hals so werstw In

[E]in gut stuck wen dw gen aine[m] drizt will er dich stechen oder schlahen / so nym dein swert in paid hendt vnd drit mit dem rechten fuss fur vnd vnd fah In den shlag oder den stich In dem drit zwischen dein handt In dass schwert / vnd stoss Im den aus auf die lincken seiten vnd In dem stoss vnd drit so far Im mit deim swert durch sein lincks pain vnd durch sein vchssen vnd heb Im das pain auf mit dem ort vnd wirf In an den Ruck oder setz Im das swert mit dem knopff vnd die handt an den hals vnd in dem setzen dar hint[er] In vnd setz Im dein rechts pain hinter sein lincks pain vnd wirff In daruber auf den Ruck


[D]as einlauffen von dem schwert wen man dir will an setzen vnter die augen so nym dein swert in baid hendt vnd heb mit deim swert sein swert auf mit voller macht / vnd wirff dein swert vber Ruck vnd begreiff In beý dem pain vnd wirff In auf den Ruck

[E]in stuck zu gewappenter handt wan dw stest In deim swert vnd hast dein lincks pain furegesetzt als man sten sol will dich ainer anstechen so trit In dem stich mit deinem rechten Pain ein wenig neben sich aus so velt er den so setz Im den oben an weist er dir das auf die lincken seiten / so las dein swert vnder gen / vnd hat er das selb linck pain fur gesetzt so setz Ims hinter das selb pain In die erden vnd In dem setz[e]n stos ihn vber das swert an den Rucken vnd mus auch gar Reschlich Zugeen