Wiktenauer logo.png

Page:MS B.26 034r.png

From Wiktenauer
Jump to: navigation, search
This page contains changes which are not marked for translation.

This page has been proofread, but needs to be validated.

EIn gut Ringen ringt ainer mit dir aus den armen So vas In mit deiner rechten handt In wentis bey seiner lincken achssell vnd mit deiner lincken handt bey seinem Rechten arm Nahent bey seynem ellenpogen vnd wen dw wilt so far Im mit deim Rechten arm durch sein lincks vchssen vnd verpint Im oben sein paid arm vnter deim Rechts vchssen vnd In dem verpinten so kere dich vmb das dein Ruck gen seim pauch stee vnd In dem verpinten vnd vmb keren versetz in mit deim euchwentigen rechten pain neben vnd hinter sein rechts pain vnd wurff In vber dein pain auf mit deim pain an sein Rucken auch must dw den vntren arm mit deiner lincken handt gar fest halten


EIn gut ringen wen dw mit aim gefast hast den arm den dw vnter hast auf der selben seiten / die selben achsel setz hart vnten an sein prust vnd truck dich vast nider vnd fass sein vntern arm mit deiner obern handt hinter dem ellenpogen vnd heb den aus vnd aus (sic) starck vnd wurff dich den vmb auf die seiten des vntern arm[e]sn vnd vass In auf die huft vnd das selb pain bey der huft setz euchwentiss neben sein pain. vnd heb In mit der huft auf vnd wurff In vber die huft vnd das pain an den Ruck

EIn gut Ringen aus den armen oder zufassen hastw mit aim gefast vnd hast dein lincken arm ob so ergreiff In bey seim hals mit deim lincken obern arm / vnd In dem greiffen wurf dich vmb auf dein Rechte seiten vnd trit fir In vnd wurff In vber dein hüft bey seim pauch vnd hals an den rucken auch mustw In dem werffen dein lincken arm zu hilff komen mit deiner Rechten handt Must dein lincke handt fassen vnd brich In mit deim lincken arm vnd paiden henden bey seim hals vber dein huft bey seim pauch an den Rucken