Aber ein gut Ringen fass ain mit deiner recht[e]n handt hinden bey seim goller vnd mit der lincken handt bey seim rechten ellenpogen vnd wen er sein lincks pain fur setzt so schlah in mit dem rechten fuss vorn mit den zehen hint[en] In sein lincke ferssen vnd In dem schlag zuck in oben bey dem hals starck nider hinttersich vnd scheub den ellenpogen starck nach vnd heb sein ferssen mit dem zehen starck auf vnd wurff in auss dem armen hintersich an sein Rückn das dw beleibst sten
- EIn ander gut Ringen / wen dw mit ainem gleich gefast hast / so greiff in lindeglich vnd gelincklich mit Im vmb sam dw gar kranck seist vnd hut dich doch die weil das er dich die weil nit werff / wen er den sein allernimst traw / so ruck in zu dir vnd heb in auf vnd schlag Im ein pain zwischen seine pain vnd wig im das mit deinem pain auf vnd wurff in an den Rucken
WIltw wen dich ainer auf hebt / das er dich nit werffen kan so schlag im dein lincks pain hinten vmb sein rechts pain In die kniepug / also das euch ewer paid kniepüg in ein ander hengen / vnd kleib also bey Im / so mag er dich nicht vo[n] Im werffen / vnd wo er dich hin will piegen oder stossen / so setz albeg dein rechts ledigs pain fur vnd las dich darauf stoss[e]n tregt er dich dan zu ainer panck vnd will dich daruber werff[e]n so stoss mit dem ledigen fuss In die pank das er daruon gar wert dargelt / so er dich freilich nit werffen
- EIn gut halten / vnd fassen das ainer zu dir nicht kan kamen / so fas In mit deiner rechten handt bey seiner lincken achssell auff der prust vnd mit deiner lincken handt hinden In dem Rucken bey der gurtl od[er] wames vnd zeuch In mit der selben handt starck zu dir vnd mit der obern recht[en] handt bey der achssell scheub In starck von dir so mag er zu dir mit kainem ringen komen
