Virothmen · der Kempffer · hat den Orgmenuen · Etheum In ainnem kampff vberwunden · deßgleichen hat · Pitarus Mitilonaus · den Hauptman von Athen Phrÿnonem · Inn ainnem kampff erlegt · Hector · ein Sun des Kunigs Priami hat vor Troia mit dem Aiacem · ainnen kampff gehallten vnnd dem Ritterlich angesiget Alexander Magnus hat mit Poro · dem Kunig Inn India · ainnen treffenlichen Kampff gehallten vnn den mit seiner geschicklichkait vberwunden / ·
Deßgleÿchen hat auch der Kunigelich Prophet Dauid · dem grossen kempffer vnnd Risen · Goliath · eerlich angesiget · Es hat auch Antheor · dem Turno nicht on sonndere geschicklichait Im kampff obgelegen · Vnnd nachdem die Albaneser · all Ir alt herkumen · herrlichait vnnd Regiment an die Römer gesetzet · vnnd dreÿ starck kempffer des Albanesischen geschlechts Cruciaten genannt · an dreÿ der Römer mit Namen Horacÿ zu dem kampff erwöllet wurden · haben die · Horacÿ · auf der Römer seiten mit sonnderer geschicklichait · die obhannd genomen · die Cruciaten erlegt · vnnd also das ganntz Italien dardurch erobert Es ist auch der Teutsch so den Vallerium Eoruinum · zu dem kampff erfordert · Ritterlich erschlagen worden , Manlius Torquatus · hat auch ain Teutschen Fursten Inn dem Kampff erlegt · vnd Im sein · halsband abgezogen · damit Im vnnd dem ganntzen Römischen Namen · groß Eer eingelegt · Ich will geschweigen der Kaempff so Inn Teutschen lannden allenthalben vor allten Zeiten furganngen sein · Man findt Inn alten Teutschen geschrifften · das zu schwaebischen Hall an dem Kochen · vnd zu Wurtzburg · besondere Kampffrecht gehallten · auch vil kämpff alda gehallten worden sein Deßgleichen hat zu Munchen an der Ÿser · Seitz von Althaim vnnd Diepoldt Giß · Anno 1370 · zu Roß ainnen Ritterlichen Kampff gehallten · darInnen der Seÿtz von Althaim Ritterlich obgesiget hat · Deßgeleichen hat Diethrich Hachsenacker · mit dem Wigleus Marschalckh zu Augspurg am Lech · Anno · 1409 · an dem Weinmarckt zu Fuß Inn Hemmeter · Hinder zwaien Schildten · Ritterlich gekempffet · Inn welichem Kampff der Marschalck den Hachsenacker
