Ein schnit mit ainnem Reyssen
Item wann du Fur den Mann kumpst. so schickh dich also mit deinnem Duseggen. das der recht fuosz vorstee. streckh deinnen arm wol von dir vnd schneid Im nach. seinnem haupt. begert er dich also zu schneiden. vnnd du auch mit dem rechten fuosz gegen Im steest. so haw einnen geraden haw. Im zu dem haupt. vnnd Inn dem einhawen fall Im mit deinnem gehultz vber seinnen rechten arm. bey seinnem duseggen. vnnd reys damit vnndersich. so hastu Im den schnit prochen Indes volg mit deinnem lincken schennckel hinnach auf sein rechten seitten. vnnd haw Im mit der zwirch zu seinnem haupt. Zwircht er dir also zu deinnem haupt. so setz deinen rechten schennckel. zuruckh vnnd verscheub Im die zwirch mit deinner lanngen schneid Indes scheusz Im mit deinnem duseggen. zu seinnem gesicht. wirt Er des ein schiessens gewar. vnd versetzt dir das. so trit mit deinnem Rechten fuosz wider hinein vnnd lasz ain zwifachen feler behennd lauffen. Indes haw nach seinnem rechten arm. hawt er dir also deinner rechten seitten zu. so trit Inn. trianngel vnnd wend die lanng schneid vber dein haupt. so geet der haw hinweckh. auf deinner langen schneid Indes raiss Im zwifach nach vnd haw Im zu seinner obern plosz.
