Einn verkerer mit ainnem Dopelten oberhau
Item wann du mit Dem zufechten zu dem Mann kompst so schickh dich also/ stannd mit deinnem lincken fuosz vor vnd haw Im zwifach oben ein Indem als bald du seines duseggens empfindest. so volg mit deinem rechten schenckel hinnach. vnd greiff mit deinner linckhen hannd nach seiner rechten Ochsen vnd scheub Inn damit von dir so verkerstu In. verkert Er dich also. vonn Im. vnnd du mit deinnem Rechten fuosz vor steest. Inn dem verkerer. so zeuch deinnen lincken fuosz zuruckh. vnd stich Im zwifach nach seinnem gesicht. oder der prust. versetzt Er dir das so volg mit deinnem rechten fuosz wider hinein. vnd haw Im nach seinem haupt. wirt er des haws gewar vnd versetzt dir den furbas. so ganng auf mit deinnem Duseggen fur dein haupt. das der Ort auf der lincken seitten hanng. vnd greiff mit deinner lincken hand nach deinnem Ort vnd schlag In mit dem gehultz nach seinnem haupt. hawt Er dir dann also mit seinnem hefft. auf dich. so verscheub Im das mit der kron. Indes lasz behennd ablauffen vnnd haw Im mit der zwirch zu seinnem haupt. versetzt er dir das. so haw von ainner plösse zu der andern. vnnden vnd oben wa du In ploss findest.
