Die anderen zwan obern anpinden von der Lincken seiten.
Item schickh dich Allso mit dem zufechten. In den obern anpund von deiner lincken seiten stat er dann auch allso gegen dir Inn dem obern anpund von seiner lincken. seiten. so trit mit deinnem lincken schennckel hinnein Indes empfind ob hert oder waich sey Inn dem anpund Ist er waich. so trit mit deinnem rechten schennckel hinnach vnd stosz Im nach seinem angesicht. Nimpt er dir das ab. so winnd dich Indes durch von deinner rechten auf sein rechten. seiten. windt er dir allso nach deinner rechten seitten. vnd du auch gegen Im steest In dem anpund / deinen lincken fuosz furgesetzt. so versetz Im das. Indem trit mit deinem Rechten schennckel hinnach vnd stosz. Im nach seinem gesicht. vber seinem rechten arm. hinein versetzt er dir das. so wind dich durch mit deinem ort. auf sein rechten seiten. vnd stosz Im mit deinnem Ort. nach seinner rechten seiten. setzt er dir das ab. so volg mit deinnem lincken schennckel hinnach. vnd wind Im deinnen hindern ort zwischen seinnen baiden. Armen hin durch zu seinnem gesicht. windt er dir allso zu deinnem gesicht. so setz deinnen rechten schenckel zuruckh. vnnd setz Im das ab mit deinem vordern orth. Indes wind Im deinnen hindern ort. auch zu seinnem gesicht. volg mit deinnem rechten schennckel wider hinnach. vnd schlag Im mit der halben. stanngen. mit baiden hennden. nach seinnem haupt. zeuch damit ab Inn gutter versatzung /
