Ain vnnders einlauffen gögen ainnen vnndern absetzen
Item schickh dich also mit disem Zufechten wann du dich zu dem Mann sichst So pind Im vornen an seinen spiesz das dein lincker fuosz vorstet vnnd Inn dem anpinden empfind ob er waich oder hert sey an seinen spiesz ist Er waich gögen dir vnnd helt dir mit starckh wider so lasz deinen spiesz behend durch deine hend zuruckh lauffen Indes trit mit deinem rechten schenkel hinnein. vnnd stosz Im nach seinem hals Ist er dir also eingelauffen vnnd stost dir. nach deinem hals. vnnd du mit deinem lincken fuosz vorsteest. dein lincke hannd bey deinem lincken knie den hindern Ort bey deinem rechten schenckel so trit mit deinem rechten fuosz hinnein vnnd setz Im seinen Ort ab zwischen deinen baiden henden Inn deinem spiesz auf dein rechte seiten In dem setz deinen rechten schenckel wider zuruckh vnnd wind dich mit deinem spiesz auf dein rechte seiten vnnd In dem winden lasz deinen spiesz zuruckh lauffen durch deine hend so kanstu mit deinem vordern ort mit Im zugleicher arbait komen Indes wechsel Im durch an seinem spiesz von seiner lincken seiten auf sein rechte vnnd stosz Im damit nach seinem gesicht wechelt er dir also durch vnnd stost dir nach deinem gesicht. so setz Im das ab mit deinem vordern Ort auf dein rechten seiten vnnd zeuch deinen rechten schenckel widerumb zuruckh Indes scheusz Im deinen spiesz auf sein rechte seiten mit deinem vordern Ort zu seinem gesicht vnnd zeuch dich damit zuruckh Inn guter versatzung
