Ein abnemen gögen dem Frey stosz so aus der sterckhe gat
Item schickh dich allso Inn das Abnemen gögen dem freystosz stee mit deinem linckh fuosz vor deinen spiesz Wol vber dein haupt die recht hannd hinden bey deinem Ort die linckh wol vornen In dem spiesz das der vorder ort auf der erdt ligt stost Er dann auf dich ausz der sterckhe seinen lincken fuosz furgesetzt so nimb Im das ab von deiner rechten vnnd lincken seiten vnnd ganng vornen auf mit deinem spiesz Indes volg mit deinem rechten fuosz hinnach vnnd stosz Im nach seinem gesicht stost Er dir also zu deinem gesicht. so trit mit deinem lincken schenckel wider zuruckh vnnd verwechsel die recht hand an deinem spiesz vnnd wend deinen spiesz auf dein rechten seiten so nimbstu Im seinen stosz damit ab. Indem gang Im ausz dem anpvnd zu seinem gesicht. auf sein rechte seiten setzt Er dir das ab so wind Im von seiner rechten auf sein lincke seiten zu seiner prust. stost Er dir also zu deiner prust vnnd du mit deinem rechten fuosz vorsteest so wechsel behend durch von seiner lincken auf sein rechten seiten vnnd stosz Im damit zu seinen gemechten Indes zeuch dich In dem wechsel zuruckh vnd hab deines gesichts gute acht Inn dem wind Im von deiner rechten auf sein rechte seiten
