Zwen vnnder schnit
Item wann Ir zusamen gond So schickh dich also mit Inn dises stuckh stannd mit deinnel rechten fuosz vor vnnd hallt dein Seges mit deiner rechten hand Inn deinem mitlen hefft dein lincke Inn deinem vnndern Inn ainem vnndern schnit Inn dem trit zwifach Inn trianngel vnnd schneid Im nach seinem rechten Arm. hinder deinem haupt herfur das dir die Arm Creytzweisz vber ainann der komen. Schneid er dir also zu. vnnd du auch mit deinem rechten fuosz gögen Im steest vnd. helt dein Seges Inn ainem vnndern schnit dem rechte hand bey deinem mitlen hefft. dein lincke bey deinnem vnndern. so far ybersich ausz deinem vnnden schnit vnnd nimb Im seinen schnit auszwendig In dein Seges hinweckh auf dein rechte seiten. Inndem trit mit deinem lincken schennckel Inn triangel auf dein lincke seiten vnnd wind Im dein Seges hinder deinem haupt herfur mit ainem schnit zu seinem haupt. das dir die Arm Creitzweysz vber ainannder kumen. Indes trit von Im zuruckh In guoter versatzung.
