Ein geschrennckhter schnit gögen ainem offnen
Item schickh dich also In Dises stuckh wann Ir zusamen gond. stand mit deinem rechten fuosz vor vnnd hallt dein Seges mit deiner lincken hannd Inn deinem vndern. hefft dein rechte Inn deinem mitlen gestrackt gögen dem Man. Indes schneid Im vmb seinen leib hinumb nach seinem rechte schennckel. Schneidt er dir also vnnden zu vnnd du mit deinem lincken fuosz. gögen Im steest. vnnd. helst dein Seges mit Creytzweisen armen gögen dem Man. so nimb Im das an vnden mit deinem hefft. auf dein lincke seiten. Inndem schneid Im behend nach seinem hals Schneidt er dir also oben zu. so trit mit deinem lincken schennckel hinumb auf dein rechte seiten. vnnd nimb Im seinen schnit mit deinem gehultz ab auf dein rechte seiten. Inn dem schneid Im nach seinem linckhen furgesetzen schennckel. Schneidt er dir also vnnden zu. so setz dein vnnder hefft deiner Seges fur deinen linnckhen schennckel vnd mit deinem Rechten trit auch zu deinem lincken vnd nimb Im seinen vnndern schnit damit ab Indes gee auf vnnd schneid Im nach seinem hals. trit damit von Im zuruckh.
