Zwen Armschnit
Item wann Ir Züsamen gond So schickh dich also Inn dises stuckh. stannd mit deinem rechten fuosz vor vnnd hallt dein Seges mit deiner rechten hand Inn deinem mitlen hefft. dein lincke Inn deinem vnndern gögen dem man Inn ainem obern schnit Indes schneid Im auszwendig nach seinem rechten Arm. schneidt er dir also oben zu vnnd du auch mit deinem rechten fuosz gögen Im steest vnnd helst dein Seges mit deinner rechten hand Inn deinem mitlen hefft. dein linckhe Inn deinem vnndern gögen dem Man. so setz Im das ab mit deinem vnndern hefft In dem schneid Im mit deiner Seges von vnnden Innwendig nach seinem rechten Arm. Schneidt er dir alsozu von vnnden. so verwechsel dein lincke hand ausz deinem vnndern hefft In das mitel. vnnd dein rechte an deiner lincken stat In das vnnder hefft. so entgeestu Im ausz seinem schnit. Indes schneid Im behend von vnnden nach seinem rechten Arm. vnnd tritt damit von Im zuruckh Inn guter versatzuung mit deiner Seges.
