Ein schnit gögen ainem abnemen
Item hallt dich also mit Disem stuckh wann Ir zusamen gond stannd mit deinem lincken fuosz vor. vnnd hallt dein Seges mit deiner rechten hand Inn deinem mitlen hefft. dein lincke Inn deinem vnndern. gestrackt vor deinem leib Indes schneid Im behend nach seinem rechten Arm schneidt er dir also zu vnnd du mit deinem rechten fuosz gögen Im steest. vnnd helst dein Seges mit deiner lincken hennd Inn deinem vnndern hefft. dein rechte inn deinem mitlen gögen dem Man. so far ybersich mit deiner Seges vnnd nimb Im seinen schnit damit hinweckh auf dein rechte seiten Indem schneid Im mit deiner Seges nach seinem rechten Arm. Schneidt er dir also zu. so nimb Im das ab zwischen baiden hennden Inn dein gehultz. Indes lasz dein lincke hannd von deinem vndern hefft vnd trit mit deinem lincken schennckel zuruckh. so entgestu Im ausz seinem schnit Im dem greiff mit deiner lincken hand wider Inn dein vnnder hefft. vnnd mit deinem lincken schennckel trit widerumb hinnein. schneid Im damit nach seinem hals seiner rechten seiten. vnnd trit von Im zuRuckh
