Ein oberer schnit gogen ainem vndern
Item wann Ir züsamen gond So hallt dich also mit disem stuckh stannd mit deinem rechten fuosz vor vnnd hallt dein Seges mit deiner rechten hand Inn deinnem mitlen hefft dein lincke Inn deinem vnndern. gestrackt gögen dem man. Indes schneid Im behend vnnden nach seinem lincken furgesetzen schennckel schneidt er dir also vnnden zu vnnd du mit deinem lincken fuosz gögen Im steest. vnnd helst dein Seges auf deiner rechten seiten Inder höch / dein lincke hand Indeinem vnndern hefft. dein rechte Inn deinem mitlen. so far Im mit deiner Seges vmb seinen hals seiner. lincken seiten. zeuch In damit zu dir so bistu seines vnndern schnidts ledig Schneidt er dir also oben zu vnnd zeucht dich zu Im. so lasz dein lincke hand gön von deinem vnndern hefft setz Im damit In sein gehultz vnnd scheub starckh ybersich so nimstu Im seinem obern schnit hinweckh Indesgreiff mit deiner lincken hand widerumb In dein vnnderhefft. vnnd trit mit deinem rechten schennckel zuruckh so magstu Im seinen lincken fuosz hinweckh schneiden.
