Merain mordschlag Inn der Baurenstangen
Item wann Ir zusamen gond So hallt dich also mit disem stuckh stannd mit deinem rechten fuosz vor vnnd hallt dein stanngen mit baiden henden vor deinem gesicht. Inn der hoch gögen dem Man Inndem trit mit deinem linckhen schennckel hinnein vnnd schlag Im mit sterckh nach seinnem haupt schlecht Er dir also oben zu vnnd du auch mit deinem rechten fuosz gögen Im steest. vnnd helst dein stanngen mit baiden hennden bey deinem hindern Ort den vordern gögen dem man Inn der hoch so nimb Im das ab mit deinner stanngen auf dein linckhen seiten. Indes trit mit deinem lincken schennckel Inn trianngle auf dein rechte seinten unnd schlag Im nach seinem lincken arm Nimpt er dir das also ab mit seiner stanngen. auf sein rechte seiten so trit mit deinem rechten schennckel hinnein ausz dem Trianngel vnd schlag Im mit deinner stanngen ainen Mordschlag vornen zu seinem haupt dar er zuRuckh fellt.
