Der dusegg gogen dem schwert.
Item schickh dich also In Dises stuck mann Ir zusamen gond stannd mit deinem rechten fuosz vor vnnd halt dein Duseggen Inn deiner rechten hand gögen dem man dein lincke hannd auf deinner lincken huff Indes haw Im behend nach seinem haupt hawt er dir also oben zu vnnd du mit deinem lincken fuosz gögen Im steest so haw seinem Duseggen entgögen mit Creisz weysen armen Samb Im damit seinen haw hinweck auf dein rechte seiten Indes volg mit deinem rechten schennckel hinnach vnd lasz dein schwerdt behend uberlauffen vnnd haw Im nach seinem lincken seiten seines haupts haw Er dir also oben zu so nimb Im das ab mit deinem Duseggen auff dein lincke seiten indes spring mit deinem lincken fuosz auff dein rechte seiten vnnd haw Im nach seinem rechten Arm Hawt er dir also nach deinem rechten arm so henng mit deinem schwert wol auf dein rechte seiten vnnd versez Im seinen haw damit indes trit mit deinem lincken schennckel hinnein vnd haw Im nach seinem rechten Fur gesezten schennckel.
