Merder schweinspieszz gogen der hellenparten.
Item mann ir zusamen Gond so hallt dich also mit disem stuck stannd mit deinem lincken fuos vor vnnd hallt dein spieszz mit deinner rechten hand In deinem vnndern Ort dein lincke Inn der mitt Inn der hoch vor deinem gesicht Indes haw Im nach seinem haupt Hawt er dir also oben zu vnnd du auch mit deinem lincken fuosz gögen Im steest vnd helst dein hellenparten mit deinner rechten hand bey deinem hindern Ort hinder deinem haupt dein lincke In deiner stanngen bey dem plat gögen den man so nimb Im das ab mit deinem plat auf dein rechte seiten Indes stich Im mit deinem vodern Ort zu seiner prust Sticht er dir also zu so nimb Im das ab mit deinem spieszz auf dein rechte seiten indes trit mit deinem rechten schennckel hinnein lasz damit deinen spieszz fallen Inn dem greiff Im mit deiner lincken hand hinder seinem hals hin umbauff sein rechte achsel vnnd mit deiner rechten nach seinem lincken schennckel heb damit starck ober sich so wirfstu In auff das angesicht has tu In also geworffen so magstu wol deinen spieszz wider umfallen vnnd deines gefallens mit Im hanndlen mit hawen oder stechen.
