Ain ansezen zu den gemechten gögen ainem Absezen
Item wann Ir zusamen Gond so schickh dich also Inn dises sückh stannd mit deinem lincken fuoß vor unnd halt deinen spieß Inn deiner rechten hand auff deiner rechten seiten Inn der mitt dein schildt vor deiner prust Inn dem scheuß Im deinen spieß nach seinem Fisier scheust er dir also ein mit seinem spieß unnd du auch mit deinem lincken fuoß gogen Im steest unnd helst deinen spieß mit baiden henden auf deiner rechten seitten neben deiner prust so nimb Im das ab mit deinem spiess auff dein rechten seitten unnd volg mit deinem rechten schennckel hinnach unnd stoß Im mit deinem spieß nach seinem hals Indes laß deinen schildt und spieß fallen zückh damit dein schwert unnd stich Ims zu seinen gemechten Sticht er also von unnden auf dich so zuckh dein schwert nimb Im damit seinen stuch ab zwischen baiden henden Inn dein klingen Indes volg mit deinem rechten schennckel hinnach unnd wind Im deinen Ort mit ainem stich zu seinem Fisier versezt Er dir das mit seinem schwert so verwechsel deine baiden hend Inn dein klingen und schlag Im ainen Mordschlag mit knopff und kreiz nach seinem fürgesezten schenckel wind dich und trit damit von Im zurückh
