Item uber eÿlt dich ainer und bringt baid arm̃ under und hebt dich und wil dich werfen oder trucken so greÿf im mit paiden henden auf das haubt und tauch imß oben hin dan und stos ims hinden nider so stost du im den hals ab
Item vast dich ainer mit s seiner glincken hand beÿ dem goler und mit der rechten unden peÿ der iupen so greÿf im mit deiner glingen hand in sein glenck und reÿß im umb und setz im deinen rechten elenbogen oben auf sein arm und truck in nider zu der erden daß get von paiden seÿten
Item ob einer den tencken arm nider senckt und last inen nit umb reÿßen so schleus im dein paid arm unden umb seinen rechten arm̃ nachent peÿ dem glenck und heb imen über sich auf so prichstu im den arm ab und get vo~ paiden seÿten
Item umbfacht dich ainer hinden umb in ainer schÿdt oder ringen so greÿf pald auf mit paiden henden uber dein haubt und fas in peÿ dem har so wirfstu in uber daß haubt, wiltu daß prechen so ergreÿf im sein paid elenpogen und zeuch imß zu ruck oder zeuch daß haubt vast hinder sich daß ers nit erlangen mag
