und anpinden des schwerts. wiltu anderst die maister/schafft äffen. die sich wider dich seczen.
vnnd wie du die wind(en) treiben solt. vnd wievil Ir sein an der zal. das findestu in dem letsten stuckh der zetel geschriben. das da spricht. wer wol hengt vnd winden damit pringt.
Text Der vier plöß
Vier plöß wiß
zeramen. so schlechstu gewiß
on alle var.
on zweifel wie Er gepar.
Glosa Nun soltu wissen die vier plöß an dem mentschen, Die ain plöß ist die recht seitt. Die ander die ander seit. Obert halb der Gürtel des mans, Die andern zwue das auch die Recht und die linckh seitten vnder der Gürtel. Wiltu den gewiser schlachen, wenn du mit zu vechten In in kumbt. so nym dir derselbigen ainer in den syn. vnd haw derselbigen plöß kundlich zu. vnd nit dem schwerdt. vnd acht des nit. was Er gegen dir ficht verseczt Er den haw. so arbait mit der versaczung pald. mit dem ort. oder sonst aber zu zu der nechsten plöß. also wart allweg auß der plossen des Leibs. vnd nit des schwerts. mit allen hawen vnd stichen
Text die vier ploß zu prechen.
Wiltu dich rechen.
die vier plöß kunstlichen prechen.
oben tuplir
vnden recht mutir.
Ich sag dir fürwar.
sich schuczett kain man ane vor.
hastu das vornemen,
zu schlag m Er clein komen.
Glosa Das ist wenn Ir [sic!] ainer ernstlichen ein hawet. wildtu dich dann an Im rechen. vnd In. die plöß mit kunst abgenommen vnd prechen. das Er sich an seinen danckh schlachen muß lassen. so treib das tupliern gegen der sterckh seines schwerts. vnd das mutirn gegen der schwech. so sag Ich dir fürwar. das Er sich vor schlegen nit beschüczen kan. vnd mag. da vor zu schlag nit khomen. ~
Nun merckh wie du das tuplirn treiben solt von baiden seitten.
Item wenn Er dir oben zu haut von seiner rechten Achslen. so hau auch von deiner rechten mit Im gleich starckh oben ein zu dem kopf.
