¶ Wiltu eÿn huen siden in eÿme kodrolf der vnden weit ist vnd oben eyn engen hals hat zo nym das huen vnd woerge is vnd bloze is of vnd pflocke is sewberlich das dÿ hawt nicht reisse vnd sneide is vorne an deme bawche of vnd loeze das fleisch ab vmmevndvem bis an dÿ floegel vnd an dÿ gelenke in den beÿnen vnder den dÿen vnd sewt das fleisch wol vnd hacke is mit eyern vnd petersilgen vnd tu den dy hawt von deme huene yn das glas alzo gancz wen sÿ weder vor czu ist genehet vnd loz das hawpt hÿ aüsen vnd velle sy denne yn dem glaze mit deme gehacken fleische von dem hune ader mit dem voelsal das do von gemacht ist vnd gews denne wasser dor ÿn ader iewche czu deme hune vnd las is denne wol irwarmen vnd siden yn eÿme toppe mit wasser alzo das daz wasser nicht oben ÿn das glas ge czu deme hune
¶ Wiltu geverbete huener machen wÿ du wilt zo nÿm eyn eÿ vnd bestreich is wol mit leÿn oel vnd loz is wol trucken an der zonnen vnd streich denne waze varbe du wilt an das eÿ vnd loz is aber trucken vnd leg das eÿ vnder eÿne henne das sÿ is aus bruete m ander eyern zo wirt das hun denne gestalt noch der varben
¶ Mache eyn tyer von papyer vnd mele das wy du wilt vnd tu eynen frosch oder grille dor yn vnd halt eÿn licht vor das papyer zo schreit der frosch dorÿne v ader tu eÿn frosch ÿn eyn loch an eyner want vnd mole eÿn tier of eyn papyer vnd kleybe is vor das loch vnd halt eyn licht doran ut supra
¶ Stich eyn hun durch syn gehirne vnd czu reib eÿn crawt daz heist hürses[1] czunge vnd schoecz im ÿn dÿ wunde zo wirt is weder gesunt
