Ittem schlag Im zu seim vorgesetzenn arm Innwendig zum gesicht durch, so baldt Ers versetzt, so fachr vnnden durch vnnd stos Im zur rechten blös.
Ittem schlechstu Im ober dem arm zum gesicht wie nechst glertt als baldt Er noch stost so setz von der Rechten ab vnd stos gleich mit Im hinein ⁋
Ein gut stuck Im Spies
Ittem binndt Im ann vonn deiner Lincken gegem seiner Rechtenn Je höcher Je beßer fachr mit eim schlag vonn obenn nider ann seiner stanngen durch sein finger vnnd gesicht vnnd Im schlag wechsell durch vnnd stich Im auff Seiner Linckenn seüttenn zum gesicht oder hifr die hastu gewis, durch, stos mit Eim austhritt gleüch hinein ⁋
Ittem bündt Im ann wie vor vnnd schlag ann sein Spies vonn oben durch sein gesicht mit dem ortt bis auff die Erdenn, vnnd fahr mit dem ortt auff der anndern seitten wüder übersich auch durch sein gesicht als baldt dein forteill Ersichest, so stich,
Ittem stost Er darein so stos mit Im gleich Ein mit ab wennden ⁋
