Page:MS Dresd.C.93 005r.png

Es hat aber Im anfanng Vnnd zu diser zeit · ein anndere Mainung Inn dem Fechten gehabt · vnnd nachdem ein Jeder verstenndiger Fechter selbs ermessen kan · so haben die Kunstliche stuckh vnnd verborgne griff · trit vnnd straich Im anfanng nicht wie Jetzund · herfurgethan werden mögen · aber mit der Zeit · als sich die gelerten · die ich hernach benennen will · Auch die Kunig / Fursten vnnd herren · sich der Ritterlichen übung angenommen · alda seind die bösten Kunstlichsten stuckh vnnd vortail · damit der mann Inn allem thun vnnd fa^ellen der nott · gewunnen werden möcht · durch Iren vleÿß herfurkumen · vnnd hat solches so lanng gewehret · das sie zuletst Inn Zettel oder Buecher · mit bossen vnnd schrifften · gebracht worden sein · als man dann beÿ den alten · so die Kunst geliebt noch heutigs tags · Inn der erfarung sihet ·

Zudem haben die alten Unnd Innsonders die Griechen · ein solchen lust vnnd liebe der Ritterlichen vbung ^gehabt · das sie sich etlich tag zuuor emalen sie haben Fechten wo°llen · etlicher schleckhafftiger speiß vnnd getrannckh · auch vor dem wollust der weiber · sampt allem was den Leib schwecht vnnd schweren athem machet / enthallten, vnnd sich der speis · als flaisch vnnd annders so den leib sterckt/ gebraucht · Derhalben die gelerten · Medicj ·vnnd Innsunder der weitberuembt · Galenus · mermalen daruon Kunstlich disputiert haben · ob der abpruch vnnd abstinentz · oder die vbung des Fechtens · dem leben des Mentschens nutzer seÿe · Der hailig Paulus meldet solichs Exempels weis auch Inn seinner Epistel da er sagt Ir Sehent das sich alle die · welche vmb ein zeitlich zergenngckliche Eer vnnd klainat Fechten vnnd streiten wo°llen · sich von allem wollust enthallten · Als wollt er sagen · warumb nit Ir als fromen Christen · auch , die nit vmb ein Irdisch · sonder vmb ein Himlische Eer Inn diser wellt streitten ?? Vnnd haben derhalben alle liebhaber diser Ritterlichen Kunst · wol zugedenncken · das es diser Zeit nit volle trunckne · vnnd vnbeschaidne · sonnder nuechtere geschickte · vnnd ganntz Kunstliche Fechter geben hat · Man findt auch sellten Inn schrifften · das beÿ den vrallten auß neid vnd haß · sonder auß lieb vnnd Kunst gefochten worden seÿ als laider zu vnnser Zeit vil beschicht · Wann die alten sich gecastigeÿet vnnd also den tag des Fechtens erwartet haben Da hat man dann die Fechter mit Iren gewho°ren darInnen sie haben Fechten sollen · ganntz Eerlich auf we°gen zu dem Fechtplatz oder · Theatrum · gefuert · vnnd Inen die gewinneter vnnd Clainat fein abgemalt Conterfect ·