Page:Cod.10825 015ar.png

Register.

Hernacher uolgt das Register, welchs alle Gewheren, wie die in disem kunst fechtbuch nacheinander gerichtet worden seind, Inn sich haltend. &c

·1· Das schwert ist das uralt haubtstuck, darinnen auch beỷ Juden, haiden, unnd Christenn, uil Ritterliche ubung, gehalten worden, Unnd noch heuttigis tags die maisterschafft dar., rinnen probiert wirt. Inn welichem ·12   stend, mit allerlay abwechßlung, bruchenn unnd hãŵ, nach dem Kunstlichisten, mit Possen unnd schrifften begriffen seind,

·2· Der Tussegk, welchen die alten messer genant haben, Unnd sich das redlich Uolck die Spartaner dessen uast gebraucht, unnd dardurch grosse Eer eingelegt haben, hat schriftlich und mitt possen ·44· stend in sich halten.,

·3· Das Stenglin hat seinen ursprung uon den Rỏmern unnd Persiern, wirt an stat der scheftlin gebraucht, hat gar gutter stend ·22· Inn Im begriffen,

·4· Der lang spieß, der Zeit ein pråchtlich fechten, aber an den Jarn nicht uast alt, hat in Im mit seinem stucken ·    Stend.,

·5· Die hellenbarn gar ein alte wher, haben die kriegßweiber, so man Amazones genent hat, erstlich erfunden, Ist mit ·20· gutten stenden beschriben unnd possiert worden,

·6· Es haben die alten ein kunst des fechtens mit der Segenß gehalten, hat auch sein besondere uersatung unnd uortail, hat ·  · Stend In Ir wie gesehen wirt,

·7· Noch ist ein alte gewher, welche die Sarmati · Hunos, unnd andere uỏlcker, uor Jarn gebrauchtt haben, der Drischel genant, helt in Im ·8· stuck begriffen,

·8· Die Baurnstang ist ein gewher in der not, Nicht das ainer dardurch das leben uerliere, aber zu ainer gegenwher trostlich, helt in Ir ·8· stuck,

·9· Item wher wider wher, als da ainer den andern etwan angewarnet, oder onuersehens ubereilt, gar ernstlich unnd gut, helt In Im ·12· Stuck,

·10· Deßgleichen Inn der Sichel auch, Weliches fechtenn bis Inn ·16· Stuck mit sich bringet,