Page:Cod.10825 189r.png

Zwen mittel Schnit daraus ein wurff geet.

Item halt dich also mit disem stuck, Wann Ir zusamen gond, Stand mit deinem rechtenn fuß vor, vnd halt dein Sichel in deiner rechten hand vor deinem gesicht gegen dem Mann, dein lingge auff deiner linggen hüff, In dem trit mit deinem linggen schenkel außwendig hinder seinen rechte~, vnd haw Im mit deiner Sichel mit ainem schnit vmb seinen leib hinumb auff seiner rechten seiten, Hat er dich also vmbfangen, so far Im auch mit deiner Sichel mit ainem schnit vmb seinen leib hinumb auff seiner rechten seitten, zeuch In damit zu dir, Hat er dir also angesetzt, So fall Im mit deiner lingken hand Innwendig In seinen rechten elnbogen, vnd scheub In von dir auff dein lingge seite~, Hat er dir das also abgenommen, so far Im mit deiner linggen hand vnder sein kin, scheub In damit von dir in die ho°ch, Hat er dir also angesetzt, vnd scheubt dich ubersich, So zuck dein Sichel behend, vnd schneid Im nach seinem lingken arm, so bist du seines ansetzens an dem kin ledig, Bist du des schnits am arm gewar worden, So lass dein Sichel fallen, vnd greiff Im mit deiner lingken hand oben nach seinem hals, vnd mit deiner rechten zwischen baide gemecht, heb damit wol ubersich, so wurfst du In auff dein lingke seitten,