Page:MS KK5126 114r.jpg

Im obenn ein zu dem gesicht das sein die vier windenn aus den obern zwaien Henngen

nu wiss das aus dem pflueg vonn paiden seytenn das sein die zwai vndern henngen auch sold dw treyben vier windenn mit allen irn gefertenn als aus denn obernn henngenn so werden der windenn acht vnd merchk als oft dw windest so gedennck in einem ydlichen winden besunder an den haw an den stich vnd snytt treyben solt also chumen ir aus winden vier vnd zwainczigk vnd wie dw haw stich vnd schnit treybenn sold das findest als da vor in den stuckenn geschribenn auch solt dw vor allenn dingen die acht winden fertiklich lernen mit schreiten zw paiden seytenn vnd merchk als pald dw windest so sold dw in einem yedlich enn windenn besunder nit mer prüffenn wan die zwai gefert ober waich oder hert am swert ist dar nach so treyb die stuck als sy dir da vor verklart sein wordenn

Die chunst roß fechtens des vorgenanten Johannes leichten auers mit der glos der text ein gemain Ler

dein sper Bericht
gegen rewtn mach zw nicht

glosa wenn dw reytest mit einer gläfen sy sey lannck oder kurcz oder ainer auch gegen dir vnd mit ainer so sold dw vor allenn sachenn da mit wissen die drey huetenn

// die erst huet zu ross

da schick dich also vass die gläffenn mit dem hindern ort vnder das recht ṽchsenn vnd reck im das voder tayl auf das lenngst mit dem ort gegen dem gesicht

die ander

da schick dich also mit fass die glaffen mit dem hindern ort vnder das ṽchsenn vnnd las sy zw deiner tencken seyten neben des hals nyder hangen vnd rewt also zw im

die trit huet

da schick dich also mit fass dein glaffen mit paiden hennden in der mytte vnd halt sy vor dir twerchs auf dem satelpogen das der ort zw deiner tenncken seytenn pleyb vnd reẅt also zw im

vnd aus denn hueten sold dw im zw hannd des erstenn In dem an hebenn mit deiner gläffenn In die seyten abseczenn mit chunst vnd mit sterck also das dw In domit treffest vnd er dich nicht

Der text der stuck aus den drein hueten

ob es empfalle
den end Im ab schnalle

das stuck aus der ersten huet das treyb also wenn dw dein glaffenn auf das lenngst aus gegen dem arm gerecht hast vnd er die sein gegen dir wider so rewt auf In vnd als dw in in das gesicht wellest stechen wenn dw nachet zw im chumbst so las dein glaffenn vorn nyder sincken vnd wechsel do mit vnden durch sein gläffen zw seiner rechtenn seytenn so trifst dw vnd er nicht

das stuck aus der andernn huet treyb also wann dw mit im zue reytest so las dein gläffenn vorn nyder sinckenn zw deiner tennckenn seyten reẅt er den auf dich mit der gläffenn so streich slecht auf zw deiner rechten seytenn mit deiner gläffenn an die sein vnd heb do mit ein wenig ṽbersich so triffs dw vnd er nicht

das stuck aus der / huet triten / das treyb also wenn dw mit im zw reytest so halt dein gläffenn mit paiden hennde in der mitte vor dier twerchs auf dem satelpogen reẅt er denn auf dich mit der glaffenn so streich mit dem vndern tail deiner glaffenn zw seiner rechtenn seyten an die sein vnd schlach dein gläffenn do mit vnder dein rechtes ṽechsenn vnd rewt fur dich so trifest dw vnd er nicht auch sold dw in allen deinen hüetn mit der tenckenn hand der gläffen zw hilf chumenn durch der sterck willenn

Text von ringen zw Ross