Page:MS KK5126 120r.jpg

Zesuechen wenn es sein drey wer die habenn vier orter die erst yst die gläffenn die ander der tegenn der hat einen ort die trit das swert das hat zwai orter das ist der spicz vnd der chnopf vnd wie dw mit denn ortern arbaiten sold das findest dw

Hie hebt sich an die chunst zechampf fechtn mit / swert dem // gegen swertt

Wo man von schaiden
swert zucken sicht vonn In paidenn
so sol man streckenn die schutten
recht eben merckest

glosa Nu merck ob ir paid die glaffenn verschossenn hiett vnnd wolt fechten mit denn swerten so sold dw vor allenn dingen wissenn die vier hueten mit dem churczen sneyd dar aus sold dw im albeg zw dem gesicht starck zw stechenn stichtt er denn mit dir geleych ein oder verseczt so pleyb starck am swert Im mit dem ortt vor dem gesicht oder der prüst so merchk ob er starck oder swach am swert sey Ist er starck so treyb die stuck die zw der sterck gehorn yst er swach so treyb auch was zw der swech gehörtt

Der erst huet zw champf mit Irn stuckenn

Halt dein swert mit der rechtenn hannd bey der hannd hab vnd mit der tencken greyff mitten in die chlingen vnd halt es zw der rechtenn seytenn vber dem haubt und laß den ort vndersich hanngen dem man gegen dem gesicht vnd das der tenck // _{/// fueß vor ste}

wenn dw stest in der obern huet stet er denn gegn dir In der vnderen vnd wil dir vnden zue stechenn da sold dw im nit wern noch verseczenn sunder stich im zue dem gesicht oder secz im vnden an so kann er dich vnden nit gewinnen wann alle ebrew obern an seczen prechenn vnd ledigenn die vnderenn oder sticht er dir oben zue es sey zu dem gesicht oder wo es sey das sold dw Im wern als her nach bechlärt wird dar vmb das er dich obenn nit vberleng mit ann seczenn

Wenn dw stest in der obern huet sticht er dir denn oben zue so stich ebenn nydenn durch zwischenn dem swert vnd seiner vorgesecztenn hand vnd druck den chnopf zw der erdn vnd wind im deinen ortt an sein swercz klingen vndenn durch vnnd secz im an zw seiner rechtenn seytenn

wenn dw stest in der obern huet so stich Im denn aus chünstlich zw dem gesicht verseczt er mit dem swert von seiner tencken hannd vnd pleybt dir mit dem ortt vor dem gesicht vnd wil dir an seczen so begreyff mit der tenncken hannd sein swertt bey dem ortt vnd halt es vest vnd stich ym mit der rechtenn hannd mit macht In die hodenn

Zuckt er denn sein swert vast an sich vnd wil dir das aus der hanndt reyssen so laß das swert vbaring farn so enplesst er die seytenn mit dem begreyff dein swertt pald mit der tenckenn hannd mitten in der chlingen und volg Im nach zw der selbigenn seytenn mit anseczenn oder mit ringenn

Wenn dw stest in der oberenn huet so stich im aus zw dem gesicht verseczt er den stich vnnd druckt denn ort auf dein rechte seytenn so spring mit dem rechten hinder seinen denncken vnd far im mit dem chnopf vornn vber sein rechte achsel vmb denn hals vnnd ruchk In da mit vber dein rechtes chnye

wenn er dir mit dem chnopf vmb denn hals fert so laß dein swert vallenn vnnd begreyff mit deiner rechtenn hannd sein rechte vnnd mit der tennckenn faß in mit dem rechtenn elpogenn vnd spring mit dem tencken fueß hinder sein rechten vnd vnd [!] treyb denn armpruch vnnd würff in da vber denn fueß

wenn er dir mit dem chnopf vmb denn hals fert so begreyff mit der tenncken hand sein rechtenn elpogenn vnd stos in do mit von dir vnd mit der rechtenn stich in mit macht hindenn zw dem ruchk