Page:MS KK5126 115r.jpg

Vnd pist selbert nicht sicher auf dem ross

Hie hebt sich die chunst zeross mit dem Swertt

wenn dw wild fechten ze ross mit dem swert so sold dw wissenn zwo huett

wenn dw siczt auf dem ross vnd halt das swert pey der rechten hannd pey der hannthab vnd leg es mit der klingenn auf dein rechten arm //

die ander huet

wenn dw siczt auf einem ross vnd halt dein swert zw deiner rechtenn hand zw deiner rechtenn seytenn hoch ob deinem hawbt vnd heng im den ort gegen dem gesicht /

die trit

wenn dw siczt auf dem roß So halt dein swert mit der rechten hand neben deinem pain das der ort vber sich gegen dem man ste

der vierd

wen dw siczt auf dem roß so halt dein swert in der rechten hand vnd secz den chnopf an den satelpogen das der ort gegn Im ste

die fünnfft huett

wenn dw siczt auf dem ross vnd halt dein swert mit der rechten hand pey der handhab vnd mit der tenckenn greyff mitten in die chlingenn vnd halt es vor dir twerchs auf dem satel

Der text vom daschenhaw

Ob es sich verwandelt
das swert gegen swert wirt gehanndelt
recht vas die sterck
taschenhaw dw suech vnd merchk

glosa yst ob ir paid werd chumen von den glaffen vnd sold mit swertenn fechten So merck wenn dw zu im reẅtest so leg dein swert auf dein tencke arm In die huet vnd reyt gerad vnder die augen zu seiner rechten seyten Hawt er denn auf dich oder sticht dier zw dem gesicht so far auf vnd versecz mit der langen sneydt in die sterck des swertz das dein ort gegen seiner rechtenn seytenn ste vnd stich im Indes zw dem gesicht verseczt er den stich vnd fert hoch auf so haw im mit der langen sneyd nach dem zam oder nach der tennckenn hant

oder

ob dich das ros vertrüeg so haw Im nach dem rechtenn pain In dem hin rennen

Der text

lern wol starck schüten
allen treffenn an far damit nöt In
secz an an far
wer sträuft henng im zw dem har

[D]as ist nu in allen hewen vnd in allenn gefertenn starck sold ann pinden an dem swert vnd in am swert nötten vnd twingen mit dem ort vnd gar chunstleichen versuechenn ob dw mügst an geseczen verseczt er vnd reyt an so far mit dem chnopf von vnden auf vber sein swert Im vber sein dencke achsel vmb denn hals vnd chum mit der tencken hand hinten in dem chnopf zehilf vnd ruck in fur sich auf die seytenn

Item

wenn dw im zue hawest verseczt er vnd tritt domit nachen an dich So pegreyff sein rechte hannd mit deiner tenckenn vnd mit der rechten secz im das ort in das gesicht

[W]enn dw im aber ein hawst oben verseczt er vnd chumbt da mit nachen an dich so far im mit dem gehilcz deins swercz vnder den chinpacken mit der rechten hand pegreyf in auf seiner denckenn seyten pey dem eysnhuet oder bey dem chopf vnd zeuch in do mit zw dir vnd mit dem gehilcz stöß von dir so velt er

wenn du denn Im hoch oben ein haust fert er denn hoch obenn auf mit der versaczung so var Im mit dem gehilcz hinder seinen elpogenn vnder den arm vnd stöss obenn von dier vnd vnd [!] far mit dem rechten