Page:2º Cod.MS.Philos.62 48v.jpg

Zur .46. figura explicatio vom Bruch auf den Hacken das ausschlupffen gennand.

Was eigentlich der hacken im ringen seÿ, zeigen die nachfolgenden figuren an, also nemlich das einer dem andern einen fus oder schenckel vmb den seinen hacket vnd zuegleich angreifft nach den schwechen nach dem gewicht vnd declination des leibes vnd folgendes zur erde verffet, wie beÿ einer jdern figura wird angezeiget werden, dieweil aber der Autor in dieser figura des hackentz auschupfens oder auschlagens gedenckt welches mit den fußen geschehen mus, wie der Autor selber meldet, ihm darnach beim rechten schenckel, mit seiner rechten hand angreifft, vnd mit der lincken ihn vmd den leib faßet, vnd in die hohe hebet, ich halte es aber fur gewißer, wen man mit dem lincken schenckl den kegendeil den hacken oder rechten schenckel hat ausgeschlagen, das man also, wie bei der 5. oder beÿ der 39. figura ist gemeldet word’ nach dem gewicht. Declination vnd schwechen des leibs procediren soll, so kan man ihme leichtlicher zue der erde helffen, doch kan ein starcker mit solchen griffen wie in dieser figura demonstriret wird, auch leichtlich fort kommen.