Page:2º Cod.MS.Philos.62 28v.jpg

Zur .25. figura explicatio von den Zwo huffen

Diese 25. figura ist der vorigen gar gleich allein das sich der Autor alhie auf die ander vnd lincke seite gesteld ist nur eine vmbwechselung der arme vnd der fuße, vnd dz das gewichte vnd declination nach der andern seiten genommen wirdt, wie in vorigen figuren alle zum offtern mahl gedacht ist.

Vnd ist nur also gnugsamb von die zwo arten zue ringen geschrieben, als nemblich von der probirung der schwechen des leibes vnd eußerlichen gliedern, darnach von probirunge der stercke daman den ganzen leib angreifft, vnd mus doch in beiden arten das gewicht, die declination vnd schweche des leibs vnd der eußerlichen gliedern betrachtet werd’ in den nachfolgenden figuren ist die dritte art zue ringen, wie den die kegenwertigen oder nachfolgenden figuren augenscheinlich anzeigen werden, ist doch der ersten art nicht fast vngleich, dieweill diese art zue mehrern teille nur in extremitatio vnd eußersten schwechen des leibes gesucht vnd gebrauchet wirdallein das der Autor seinem kegenteil in diesen figuren alzeit den ersten vorteil od’ den rechten grif, es sei nun mit einen od’ mit beiden henden erlaubet, es sei an den armen, achseln am halse vmd den ganzen leib faßet vnd demonstriret in einer idern figura sond’lich wie man sich wied’umb von des anfaßenden griffen sol loß machen, demonstrationibus oder Regulis sol angreiffen, vnd folgendes wie vor nach der austeilung des leibes, od nach den schwechen deselbig’ sol wied’umb angreiffen vnd denselbigen folgendes nach dem gewicht vnd declination zur erden werffen.