Page:MS M.I.29 136v.jpg

Ein gut halten nider ringen

Item Begriff mit diner rechten hant sinen rechten arm hintter siner rechten hant vnd mit der lincken hant nÿm ÿm daß gewichtt bÿ synem rechten elnbogen vnd stos siner rechten arm mit diner rechen hant wol vber dinen lincken arm vnd tritt hinder yn vnd halt yn vest hostu yn nit gewurffen so begriff sin recht peyn hinder dÿn knye vnd wurff yn

Ein gut lere

Hastu eynen vntter dich geworffen so schnid oder ryeß ein groß stuck aus sinem waffen rock vnd stich ÿm in daß visier mit dem tegen vnd loß dz ym nicht auß gewÿnnen daß y ist gut wen es kottig oder staubig ist wirff ÿm dz visier voll staubs oder gemil oder stich erden auß mit dem tegen vnd wurff ÿm dz in dz gesichtt

Aber ein lere

Merck magstu keÿn ploßling gesten so schnid ÿm vß dem wappen rock auff den armen oder die hossen vnd waß du sicht von nestell dz schnid auff so vinstu etlbas daß dir gut wirtt vnd sich gar eben auff sin tegen das er dir do mit nit schade ~

Merck du magstu ÿn auch schlagen mit dem knopff oder stoßen zu dem hertzen wie er leutt oder zu den achsell oder zu andern gelenckenn ~

Merck im dem vorreüten / Schlag oben oder vnten an sin enckell vnd zuch oben auff sin sitenn mit der rechten hantt ~

Et Fimis / (!)